நான் எனப்படும் நான் : 083

” நான் தேடும் செவ்வந்திப்பூவிது ” என்ற பாடல் FM இல் ஒலிக்க எனக்கு முடி திருத்துபவர் சிரித்து கொண்டே சொன்னார்

” ராஜா ராஜா தான். அப்படியே உள்ளே ஐஸ் மாதிரி இறங்குது பாருங்க “.

SivaKumar SivaShanmugham ஏனோ நினைவுக்கு வந்தார். ராஜாவின் ரசிகர். கேட்டால் மகிழ்வார் என்று தோன்றியது.

” முடி வெட்டவே இல்லை போல ” சிரித்தார். சிரித்தேன். பிறகு சொன்னார் ..

” நிறைய பேர் Trimmer க்கு போய் விட்டார்கள். தொழில் பாதிக்கிறது ”

எனக்கு என் Trimmer ஞாபகத்திற்கு வந்தது. ஒருவருக்கு வசதி, இன்னொருவருக்கு தொழிலை பாதிப்பது என்பது எவ்வளவு பெரிய முரண் !

” கொஞ்சமா Weight போட்டுட்டீங்க போல ”

என்று சிரித்தார். சிரித்தேன்.

” ஆனா உங்களை நம்ப முடியாது. சட்டுன்னு வேற மாதிரி வருவீங்க ”

முடி திருத்துபவர்கள் தான் நம்மை எவ்வளவு அழகாக புரிந்து வைத்திருக்கிறார்கள் !?

கொஞ்ச நேர மௌனம். பின் சொன்னார்.

” 30 வருஷ தொழில். விட்டுடலாமா ன்னு கூட தோணுச்சு. அவ்வளவு இழப்பு. வேறு வேலைக்கு போக யோசிச்சேன். ”

அதை சிரித்து கொண்டே சொன்னார். நம்மில் எத்தனை பேரால் இழப்பை சிரித்து சொல்ல முடியும் ?. முகம் கொஞ்சம் சோகமாக மாறியது அவருக்கு.

” தொழில் இருக்கும் போகும். ஆனால் திறமை எப்பவும் இருக்கும். அதை விடலாமா ? ” என்று கேட்டேன். பின்னே ? Training எப்போதும் Training Hall லுக்கு உள்ளே மட்டுமா நடக்கும் என்று நீங்கள் நினைக்கிறீர்கள் ?

ஏதோ சொல்ல வந்தவர் நிறுத்திவிட்டு என்னை தீர்க்கமாக பார்த்தார்.

” சரிதான். திறமை எப்போதும் நம்மிடம் இருக்கும். ஆமாம். தொழில் வரும் போகும். ஆமாம். அப்போ விடாம செய்யணும். சரி தான். ” என்று அவருக்குள்ளாக பேசினார்.

கிளம்பும்போது கேட்டேன்.

” வேறு எங்கோ வேலைக்கு போறேன்னு சொன்னீங்களே ? ”

சிரித்தார்.

” இனிமேல் எங்க போறது ? அதான் திறமையை தொட்டுடீங்களே. கஷ்டம் என்றாலும் தொடர்ச்சியாக செய்ய வேண்டியது தான் ”

முடியை இழந்து விட்ட நான் வேறு எதையோ பெற்றுக்கொண்டு வெளியே வந்தேன். அந்த மனிதனின் நம்பிக்கை சிரிப்பு –
” உனக்கு இனி அங்கே வேலை இல்லை ” என்று சொன்னது.

💐💐💐