மீள்நினைவுகள் : 011

ஒரு நிறுவனத்திற்காக செய்த நிகழ்வில் எடுத்த புகைப்படம். எண்ணங்களில் சரியில்லாத காரணத்தால் … அந்த நிறுவனத்திற்கு Bye சொல்லியது வரலாறு.

பொதுவாக பெரியவர்கள் பேச ஆரம்பித்தால் நான் அமைதியாகி விடுவது யதார்த்தம். “அனுபவம் பேசுகிறது… கேட்போமே ” என்று தான் தோன்றும் எனக்கு. ( அனுபவம் அற்ற மூடத்தனம் நிறைந்த பேச்சுகளை பெரியவர்கள் பேசினால் நான் கேட்பதில்லை. வயது காரணமாக அவர்கள் சொல்வதற்கு மரியாதை கொடுத்துவிட்டு சிரித்து நகர்ந்து விடுவதே என் இயல்பு.)

ஆனால் சரியாக பேசினால் .. ? கண்டிப்பாக நாம் அமைதியாவது தான் நல்லது. சில பெரியவர்கள் பேச்சுவாக்கில் பேசியதில் நான் எடுத்துக்கொண்டவற்றை இங்கே பகிர்கிறேன். யாருக்கு தெரியும் ? உங்களுக்கும் உதவலாம் !

” இன்று ” நான் சரி ” என்று பேசுவதை ஏதோ ஒரு காலத்தில் தவறு என்று உணர வேண்டி வரும். எனவே ” நான் சரி ” என்று சொல்லும் முன்பு பலமுறை யோசிக்க வேண்டும். சொன்னால் அதன் படி நிலைக்க வேண்டும்.

எண்ணம் சொல் செயல் .. ஆகியவற்றில் தீங்கு இல்லை எனில் ” காலத்திற்கும் ” அது சரி என்றே உணரப்படும். ( நம் மறைவிற்கு பின்னும் ! )

நாம் செய்ய வேண்டியதை நாம் செய்வதே தர்மம். செய்யாமல் இருப்பதே அதர்மம் ! இந்த உலகில் அவரவர் செய்ய வேண்டியதை செய்து விட்டால் ஏது குற்றம் குறை எல்லாம் ?

காலம் ஆக ஆக Values குறைந்து, பொருள் சேர்ப்பு மோகம் அதிகமாக மாறுவது யதார்த்தமே. இதில் Values ஐ நோக்கி நகரும் குடும்பம், தனி மனிதன் … வரம் பெற்ற குடும்பம் / தனி மனிதன் .

ஒரு ரூபாய் சேமிப்பு இரண்டு ரூபாய் வருமானத்திற்கு சமம். அதே சமயம் .. இரண்டு ரூபாய் Extra வருமானம் – மனதை சபலப்படுத்தும் காரணி. மனதை Balanced ஆக வைக்க முடிந்தவர்கள் நிறைய சம்பாதிப்பது சமூகத்திற்கு நல்லது.

மன்னிப்பை உடனே செய்து நீ விடுதலையாகி விடு. மன்னிப்பு கேட்டு எதிரி விடுதலையாவது அவன் அவள் வாழ்க்கை சம்பந்தப்பட்ட ஒன்று. அது உன் கவலை அல்ல.

உழைப்புக்கான பலன் ஏதோ ஒரு காலகட்டத்தில் உன்னை நோக்கி வந்துவிடும். அந்த இடைப்பட்ட காலத்திலும் .. நேர்மையாய் வாழ்வதே மனிதம் !

உதவ முடிந்து உதவவில்லை எனில் உன் பெயர் மனிதன் அல்ல. மனதிற்கு இதமானவன் தான் மனிதன். எனவே உதவ முடிந்து உதவவில்லை எனில் உன் பெயர் – மனக்கடினன்.

அதாவது மனதிற்கு கடினத்தை வழங்குபவன்.

புறம் பேச ஆரம்பிக்கும்போது உன்னில் இருந்து அறம் வெளியேறுகிறது.

மனதிற்கு உதவும் உதவி காலச் சிறந்தது. பண உதவி அப்போதைக்கு மட்டுமே சிறந்தது.

இவை எல்லாமுமே எனக்குள் தாக்கத்தை ஏற்படுத்தியவை. இன்று முதல் உங்களுக்குள்ளும் ஏற்படுத்தலாம். முன் வாழ்த்துக்கள்.