Jerspective : 038

” When Mist Takes Over, Get The Support of Inner Light “

வாழ்க்கையில் சட்டென மனிதர்களின் நடவடிக்கைகள் Mist ஆக மாறிவிடும் !

” நன்றாக தானே பேசிக்கொண்டு இருந்தார் …என்ன ஆச்சு இவருக்கு / இவளுக்கு ? “

என்று எனக்கு தோன்றும்போதெல்லாம் … எனக்குள் இருக்கும் ” அக வெளிச்சம் ” உதவிக்கு வந்துவிடும். அது சொல்லும் பாடங்கள் சுவாரஸ்யமானவை.

அவற்றில் சில இங்கு …

பெரும்பாலான மனிதர்கள் தங்களின் பிரச்சினைகளின் அளவுகளை கொண்டே உலகத்தை அளக்கிறார்கள். தாங்கள் மகிழ்வாக இருந்தால் அவர்களுக்கு உலகம் பற்றி ஒரு பார்வை ! தாங்கள் மகிழ்வாக இல்லையெனில் .. அவர்களுக்கு உலகம் பற்றி இன்னொரு பார்வை. மொத்தத்தில் வாயற்ற உலகம் ஒன்று அவர்களிடம் படாத பாடு படுவது யதார்த்தம் !

தனக்கு மற்றவர்கள் என்ன செய்ய வேண்டும் என்று எதிர்பார்க்கிறார்களோ அதை பெரும்பாலான மனிதர்கள் மற்றவர்களுக்கு செய்வது இல்லை. கிட்டத்தட்ட சுயநலம் தான். தான் எந்த நேரத்தில் அழைத்தாலும் உதவி செய்ய வேண்டும் என்று நினைப்பது எவ்வளவு உண்மையோ அவ்வளவு உண்மை … தான் அழைக்கப்பட்டால் ” நேரமில்லை ” என்று ஒதுங்குவது.

நன்றி சொல்ல வேண்டிய பொழுதுகளை மறத்தல் மனித இயல்பு. ” சொல்லத்தான் நினைத்தேன் – மறந்து விட்டேன் ” – என்று சொல்லும்போது இன்னொரு மனிதன் புன்னகையுடன் ” பரவாயில்லை ” என்று சிரிப்பதும் இங்கே தான் நடக்கும். ஒருமுறை விபத்தில் காயமடைந்த மனிதர்க்கு உதவிய போது .. நன்றி சொன்ன மனிதர் இப்போதும் வருடா வருடம் அதே தேதியில் அழைக்கிறார். நன்றி சொல்கிறார். என் பயிற்சி வகுப்பில் கலந்து கொண்டு தன்னை மாற்றிக்கொண்ட ஒரு பெண் ஆளுமை இப்போதும் .. குரு பூர்ணிமா அன்று நன்றி சொல்கிறார். இது மிக அபூர்வம் !

மனிதன் என்பவன் சூழ்நிலைகளின் பிள்ளை. சூழல் மாற மாற அவனும் மாறுவான். அவளும் மாறுவாள். இது இயல்பு. இதையெல்லாம் மீறி .. ஒரு மனிதன் எப்போதும் தெளிவாகவே இருப்பது தான் உண்மையான தியானம். சத்தமில்லா அறையில் .. கண்களை மூடி … எதையோ தேடிக்கொண்டு இருப்பது அல்ல தியானம் ! ஆம். Mist சூழ்நிலைகளில் அக வெளிச்சம் மூலம் தெளிவாக முன்னேறுபவனை … இந்த உலக சூழ்நிலைகள் பாதிப்பது இல்லை.

ஒரு யோகி தன் சீடர்களை பார்த்து கேட்டார் …

” தூங்கி எழுந்தாயிற்றா ? “

எல்லோரும் கேள்வி முடிவதற்குள் ” ஆம் ” என்று சொன்னார்கள்.

ஒரே ஒருவன் மட்டும் … சில நொடிகள் கழித்து ..

” மன்னியுங்கள் குருவே. இப்போது தான் அகத்தில் விழிக்கிறேன். சில நொடிகளுக்கு முன் வரை உடல் மட்டும் தான் விழித்திருந்தது “

என்று சொல்லி காலில் விழுந்தான்.

என்ன ? உங்களின் ” அக வெளிச்சம் ” விழித்திருக்கிறதா ?