படம் சொல்லும் பாடம் – 089

” போர் போன்ற மனித தோல்வி இந்த உலகில் எதுவும் இல்லை “

ஒரு போரை Zoo வில் இருக்கும் விலங்குகள் பார்வையில் இருந்து, அதைக் காப்பாற்ற முனையும் ஒரு குடும்பத்தின் பார்வையில் இருந்து யோசிக்க முடியுமா ? அது தான் இந்தப் படம்.

ஹிட்லர் என்னும் மனித முகம் பொறுத்திக்கொண்ட அரக்கன் கொன்றது மனிதர்களை, மனித தன்மையை மட்டும் அல்ல. எத்தனையோ விலங்குகளையும் தான். பாவத்திலும் பெரும் பாவம் வாயில்லா அவை ஏன் சாகிறோம் என்று தெரியாமல் – செத்துப் போவது தான். மன சாட்சி என்று ஒன்று இருந்தால் காட்சிகள் நம்மை உலுக்கும். கேள்வி கேட்கும். ஏன் இப்படி ? என்று நமக்குள் மீண்டும் மீண்டும் சொல்ல வைக்கும்.

நாம் இருக்கும் நாட்டில் … நமது வீட்டை இழந்து, தொழிலை இழந்து, பொருளாதாரத்தினை இழந்து, மனைவியை / கணவனை / மகனை / மகளை பிரிந்து, ஒரு Camp ல் தினம் தினம் சாவை எதிர்பார்த்து, வாழும் வாழ்க்கையை போல ஒரு வாழ்க்கை இருக்க முடியுமா ? அப்படி அவிழும் காட்சிகள் கண்களில் நீரை கோர்க்கின்றன.

ஹிட்லர் / Germany / உலக நாடுகள் / போர் சார்ந்த படங்களில் மனிதம் காட்சிக்கு காட்சி வழிந்து ரத்தமாகவோ அல்லது இறப்பாகவோ ஓடிக்கொண்டே இருக்கும்.

போர் வந்துவிட்டது. இருக்கும் Zoo வை காப்பாற்ற வேண்டும். அதை விட குறிப்பாக Zoo வை வைத்து Jew க்களை முடிந்த அளவு காப்பாற்ற வேண்டும். அது தான் கதை. Zoo – German படைகளுக்கு உணவுக்கான பன்றி வளர்க்கப்படும் இடமாக மாறுகிறது. இங்கே இருந்து திக் திக் தான்.

வாகனத்தில் அப்பாவுடன் செல்லும்போது சக மனிதர்களை, குழந்தைகளை சாலையில் நிராயுதபாணியாக பார்க்கும்போது அந்த மகனின் முகத்தில் தெரியும் ஒரு உணர்வு – அதற்கு ஒன்றும் செய்ய இயலாமல் பார்க்கும் அப்பா …

இரண்டு போர் வீரர்கள், ஒரு teen பெண் – காட்சிக்கு கண்ணில் நீர் கோர்த்து … கண்ணுக்குள்ளேயே ஆவியாகிப் போகும். தன்னை இழந்த அந்த Teen ன் கண்களில் தெரியும் மிரட்சி தான் போரின் மனித நேயம் அழிந்த முகவரி. அந்த Teen பெண் வரையும் ஓவியம் பேசா உலகத்தின் மௌனமான வலி.

பன்றிகளுக்கு கொடுக்கப்படும் காய்கறிகளுக்கு இடையே படுத்து தப்பிய வாழ்க்கை தான் – யூத வாழ்க்கை !

அப்பா அம்மா குழந்தை என்று அந்தக் குடும்பம் பல குடும்பங்களை காப்பாற்ற – ஒவ்வொரு நாளும் தங்கள் உயிரை பணயம் வைத்துக்கொண்டே இருக்கிறது. இந்த வாழ்க்கைக்கு இடையில் …பிறக்கும் அந்தப் பெண் குழந்தைக்கு பெயர் Teresa !

பிரிந்த உறவுகள், இறந்த உறவுகள், மீண்டும் சேரும் உறவுகள் … என்று காட்சிக்கு காட்சி மனித உறவின் மகத்துவம் இழையோடிக்கொண்டே இருக்கிறது.

குழந்தைகள் அந்த சிகப்பு இரயிலில் ஏறும்போது … மனதை பிய்த்து எறியலாம் என்றே தோன்றுகிறது.

காற்றில் பறக்கும் Carbon துகள்கள் அனைத்தும் மனித உயிர்கள் சற்று முன் வாழ்ந்ததன் அடையாளம் !!

இவ்வளவுக்கும் இடையில் Germany தோற்று … Poland மீண்டும் எழ … 300 குடும்பங்களை காப்பாற்றிய அந்தக் குடும்பத்தின் உண்மைக் கதை என்று தெரியும். போது .. மனம் நம்பிக்கை கொள்கிறது. யாரோ எங்கோ இருக்கிறார்கள் காப்பாற்ற ! உதவ.

கணவனாக நடிக்கும் Johan Heldenberg, மனைவியாக நடிக்கும் Jessica Chastian …. நடிப்பின் உயர் இலக்கணம். Johan கழுத்தில் குண்டு பட்டு … விழும் காட்சியில் நமக்கு நெஞ்சு துடிக்கிறது அல்லது கிட்டத்தட்ட மூச்சு நின்று போகிறது. உங்களுக்கும் துடித்தால், உங்களுக்கும் மூச்சு நிற்கும் உணர்வு வரும் எனில் …. நாம் மனித நேயம் மிக்கவர்கள்.