Home
Tamil
நாலடியார்: 01

11 Feb

நாலடியார்: 01

#நாலடியார் 01

#மிளிர்தமிழ்

#அறத்துப்பால்

#செல்வம்நிலையாமை

” அறுசுவை யுண்டி அமர்ந்தில்லாள் ஊட்ட

மறுசிகை நீக்கியுண் டாரும் வறிஞராய்ச்

சென்றிருப்பர் ஒரிடத்துக் கூழ்எனின் செல்வம்

றுண்டாக வைக்கற்பாற் றன்று. “

( மூன்றாம் வரியின் அமைப்பை கருதி ஒரே எழுத்தை தனியாகவும் பின் நான்காம் வரியையும் சேர்த்திருக்கிறேன் )

பொருள் ;

மனைவி விருப்பமுடன் பரிமாற, அறுசுவை உணவை இன்னொரு பிடி தேவையில்லை என்று சொல்லும் அளவிற்கு செல்வத்துடன் வாழ்ந்தவர்கள் கூட நிலைமை மாறும்போது அவர்களே ஏழையாகி, இன்னொருவர் வீட்டில் தமக்கு கூழ் வேண்டும் என்று பிச்சை எடுப்பார்கள். எனவே செல்வம் நிலையானதன்று

புதிய வார்த்தை அறிதல் :

அறுசுவை யுண்டி – ஆறு சுவையும் அடங்கிய உணவு.

அமர்ந்தில்லாள் – இல்லாள் – மனைவி

மறுசிகை – மறுபிடி ( அட ! இன்னொரு பிடி )

வறிஞர் – ஏழை ( ஆச்சர்ய பாடம் இது ! )

வைக்கற்பாற் றன்று – நிலையானதன்று. ( வைக்கம் என்றால் நிலையான என்ற பொருள் இருக்கும் போல ! )

என் பார்வை :

அசந்து போகிறேன். மனதிற்குள் ” எப்படி இவ்வளவு நாட்களாய் இதை படிக்காமல் இருந்தாய் ” என்ற கேள்வி வேறு. அதே நேரம் … மூன்று நாட்களுக்கு முன் எனக்கு திருவாசகம் அறிமுகப்படுத்திய அந்த பெரியவரை நினைத்து பார்க்கிறேன். யதார்த்தமான அந்த சந்திப்பில் என்னவோ ஒன்று உள்ளே மின்னியதே இந்த தேடல். ஏற்கெனெவே அந்த தேடல் இருந்த போதும் .. பகிர்தல் இப்போதைய மின்னல் ! அவரின் பெயர் சித்தாந்த திருத்தொண்டர் மாமணி சிவபெருமான் அவர்கள். அவர் எம் நெற்றியில் இட்ட திருநீறு இப்போது அங்கே இல்லை. ஆனால் மனதில் இருக்கிறது – மூன்று கோடுகளாய் !

கற்றலில் நான் இன்னும் வறிஞரே. புத்தக கற்றலில் மறுசிகை தேவைப்பட்டுக்கொண்டே இருக்கிறது எமக்கு. வைக்கமற்ற இந்த வாழ்வில் முடிந்தவரை கற்போம், பயணிப்போம் என்று மனதில் ஒரு ஈடு வில் உதிக்கிறது. இல்லாளாய் அமரும் புத்தகங்கள் என் விரல் தோய்ந்து தன்னிலை உணர்கின்றன. முன்னியவை சென்னியின் கண்களில் தெரிய தேடலை தொடர்கிறேன்.

Share this:

Jayasekaran Zen